是咁的，我嘅職業係動物傳心師: 148.開價

「我唔係好睇新聞同網媒嘅。」

店長聽到我依句，我見到佢嘴角幾乎勾起，但佢夾硬忍住唔笑，壓抑心中嘅喜悅。見到佢嘅表情，我就更加確定佢係想趁我唔知頭唔知路高價賣間鋪畀我，想趁生意下滑之前賺埋尾水。

「原來係咁！咁我諗你梗係好認同我哋café嘅經營理念喇！唔知你肯出幾多錢呢？我間舖有大約三十幾隻貓。」

依個時候，上次嚟見到嘅女店員走入嚟，好奇咁望住我哋。

「bb！過嚟吖，依位先生想收購我哋啲貓呀。」





個女人即刻雙眼發光，走過嚟坐喺店長旁邊同我打招呼：「你好呀我叫Zoe呀。」

原來佢就係mk店長嘅女朋友。

「你哋講到邊度？」

「我哋啱啱講到要用幾多錢收購我哋啲貓呀。」
 
「你哋心目中個價大約係幾多呢？」





「其實我哋覺得最緊要係有同道中人，錢幾多真係唔係問題嚟。最緊要係你都鍾意貓，同意我哋間鋪嘅理念，依樣係最重要。」果然係生意人，一問佢咩價錢就帶我遊花園，務求令我出價先，再根據我開嘅價錢多少考慮下一步。