是咁的，我嘅職業係動物傳心師: 147.試探

一上到去舖頭就見到一個金毛嘅mk仔，廿六七歲仲gel個過氣飛輪海頭，肥肥地留咗鬍鬚，戴副大大四方眼鏡，財大氣粗咁款。

「其實我哋仲未到營業時間，你有無預約㗎？」佢企喺門關，出奇地好好禮貌招呼我。

「我嚟係有啲嘢想同依度嘅店長傾下，唔知佢喺唔喺度呢？」

「我就係喇，有咩幫到你呢？」

我本來想直接表明來意叫佢收手，但我覺得應該爭取同佢對話嘅機會先。





我露出微笑，同佢握手：「哎呀你好你好，咁嘅我上嚟係想同你傾下生意，最主要係想收購你依度啲貓仔。」

mk店長猶豫咗一秒，之後就笑住同我握手：「歡迎歡迎，入嚟坐入嚟坐。」

理論上一個老闆無可能會將自己可以無限生財嘅工具賣斷，如果佢知間café可以繼續賺大錢，我話收購嘅時候佢就會直接叫我走，睇嚟佢已經睇咗Miki放上網嘅報導，亦都知網上好多人鬧緊佢，當話題愈炒愈熱，更加多人知佢間舖嘅衰嘢嗰陣，就算有幾多隻得意貓仔都吸引唔到客人嚟。

我喺店內坐好，佢坐對面：「你係透過我哋官網接觸我哋？定係其他途徑？譬如新聞呀網媒呀嗰啲？」