是咁的，我嘅職業係動物傳心師: 123.能力限制

「到你兩個基佬洗手喇。」Dada帶住綠燈返埋位。

「你去先。」巴膠作勢推我出去，我亦起身行去洗手間，背後傳嚟佢同綠燈嘅對話︰「嗱Dada生日，我哋今日暫時休戰。邊個再提阿金放唔放低乜乜物物即刻輸三千。」

「哇玩咁大！」

我暗自微笑，沿住走廊行去洗手間，途經一間閂咗門嘅房，門上貼住「工作人員重地，閒人免進」，我好奇望多兩眼，依成個單位嘅格局嚟睇，打開門後通向嘅地方唔係廚房水吧，但個門嘅大細同闊度又唔似係雜物房門。

我嘗試去開門，咔咔兩聲，大門上咗鎖。





「喵⋯⋯⋯⋯喵喵⋯⋯」門後隨即傳嚟虛弱嘅貓叫聲。

「先生，洗手間喺前面，唔係依度。」女店員突然喺我身旁出現，當堂嚇我一跳。

我向佢點點頭講唔該，然後繼續向前行，同時使用傳心能力。

「⋯⋯喵⋯喵⋯⋯喵⋯⋯」

咦？點解……我聽唔明佢講乜？咪住先，係我問題？定係能力限制？但我最基本嘅傳心能力有限制㗎咩？