是咁的，我嘅職業係動物傳心師: 124.有效

我停低咗腳步，身後嘅女店員仍然企喺後方，保持住一段距離觀察我。

手心開始冒汗，突如其來嘅狀況令我有啲不知所措。

「先生？有咩幫到你？」

我強行抑制自己嘅不安，轉身同女店員講無事，之後繼續行向洗手間。

我洗手，望到鏡中嘅自己已經膚色慘白，眼窩微微泛紅，典型嘅病人樣。





搖搖頭，洗面，冷靜。

打開門，走出洗手間，女店員仍然靜靜喺鋪頭門外望住我，拍恐怖片呀？嚇到阿姐個心離一離呀。

我若無其事咁行返轉頭，途經神秘房，再一次嘗試使用能力，但今次連貓叫聲都聽唔到。

我喺女店員嘅視線下乖乖行返入café。

所有貓叫聲都一如往常轉化成我聽得明嘅說話。





「好鬼攰呀……妖你咪搞啦！」一隻白貓用貓貓拳打咗係咁調戲佢嘅港女一嘢。

「我哋搞嘢好無呀？」一隻短毛貓去聞另一隻啡色貓嘅八月十五，隻啡色貓即刻咬埋去。

「今朝咪搞咗！」

我嘅傳心能力無問題，但點解啱啱會失效？