是咁的，我嘅職業係動物傳心師: 122.僅餘嘅時間

我哋幾個喺自己嗰枱擺好嘢食開餐，綠燈同巴膠對角坐，各自將塊面擰埋一邊。

「大家摸完貓記得洗手先食嘢。」我向斜對面嘅Dada打眼色，佢就好醒目咁話︰「係喎未洗手，行啦我哋。」之後拉咗綠燈去廁所。

等佢兩個出咗去之後，得返我同巴膠，我就將佢個頭擰返過嚟。

「你今年貴庚呀，仲同綠燈拗，有乜為呢？」

巴膠嘆咗口氣，皺起眉頭望住我︰「你知我哋做醫生，好多時都會逼病人聽話。多啲飲水呀、做多啲運動呀、唔好食煎炸嘢呀、食晒啲藥呀咁樣。係為佢哋個病情好⋯⋯但自從我見得愈嚟愈多無得救嘅病人之後，我慢慢就學識唔再逼佢哋聽話。」





佢轉開頭，無直接望我對眼︰「想食煙就去食；想飲酒就去飲；想買嘢就去買嘢；想做乜就做乜。綠燈唔知你無時間，所以佢想逼你放低。佢嘅眼中，你可能痛苦幾個月，往後嘅人生就會幸福；但我唔同，我知你咩事，所以我唔想見到佢逼你放低。可能你痛苦幾個月，都未開始享受幸福就無命㗎喇，所以呢……如果唔放低你會舒服啲，你唔想就唔好放啦。」

巴膠耷低頭，用力索一索鼻水，抬返起頭，眼泛淚光。

我摟住佢膊頭，拍兩拍︰「你都識講啦，我無時間喇。話唔定今次就係我哋四個最後一次聚埋一齊㗎喇，所以今日唔好再嘈依樣嘢，就純粹大家開開心心咁過啦好無？」

僅餘嘅時間，想留低開心嘅回憶。

「咁起碼我瓜柴之前個走馬燈播到今日，我都無遺憾。」





巴膠點點頭。