是咁的，我嘅職業係動物傳心師: 121.拎外賣

「你學車嗰陣呀，咪又係唔識揸車十八年？學嗰陣被師傅鬧你你都話辛苦痛苦唔想學做乜自己攞苦嚟辛啦，最後捱過咗咪學識囉！好似啲龍蝦呀蟹呀咁樣，佢哋成長換殼嘅時候都痛㗎啦，都唔舒服㗎啦，捱過咗咪好囉！」

「係吖，我學車係有呻過辛苦，但起碼想學車係我自發去做嘅，咁就算辛苦我都會頂埋落去。啲甲殼類動物係因為身體成長，個殼太細先要脫殼，佢哋都係自發咁去換殼。但阿金唔係喎，佢根本就唔係自發想放低，而係你逼佢要放低。」

兩個容易燥底嘅朋友撞埋一齊係大鑊過火星撞地球，不過佢兩個其實係中同，都鬧咗咁多年交，慣晒，由得佢兩個冷靜就好快無事。

「阻阻兩位我想屙個尿……」我作勢起身，綠燈同巴膠一人捉住我一邊膊頭將我撳低。

「我咪叫你問佢咯。阿金我有無逼你呀，你講吖？」





「你依家咪逼緊佢。」

「兩位你哋行年廿六㗎喇，點解仲可以好似小學雞咁嘈交㗎？」嘈都唔緊要，唔好夾我喺中間吖嘛。

依個時候Dada喺門口大叫︰「你三條粉友出嚟幫手拎外賣啦！」我一聽到即刻成支箭咁飛出去。

「救得靚。」我去幫Dada拎嘢，細細聲多謝佢。

「差我一餐飯。」





「好，我請你依餐。反正你生日。」Dada一嘢拍落我背脊。