是咁的，我嘅職業係動物傳心師: 120.唔得咪試下咯

「我夠知叫佢放低係對佢好，但如果佢覺得夾硬放低比繼續背負更加痛苦，咁我哋又點解要逼佢呢？」巴膠放棄同隻波斯貓影相。

「啲話題咁沉重我會頭痛，外賣到未呀？」Dada想扯開話題，但唔成功。

綠燈將我帶去佢同巴膠中間坐低︰「咁你咪問下佢邊個痛苦啲咯。」

「其實我都自虐慣啦，你哋唔使爭論喎。」我嘗試幫佢兩個打圓場，但睇個勢似乎火星撞地球已經無可避免。

「我只係叫你唔好成日將自己嗰套強加喺人哋身上啫。」唔通我入嚟之前聞到嘅怪味係火藥味？





「你點知我係強加？話唔定試下之後阿金會覺得放低舒服啲呢？」夾喺中間嘅我都唔知要露出咩表情先好，啲貓貓已經好醒目走開晒。

「我去睇下外賣到未呀下。」Dada乘機跟啲貓一齊離開現場。

「佢放得低的話，五年嚟點都放低咗啦。」

「巨人夠一百年喺牆外面啦，第一百零一年咪又係入侵咗個咩咩城。太陽照常升起一億年所以我哋會覺得聽日太陽會升起係理所當然，但唔係咯。以前唔得嘅嘢唔代表將來唔得，唔得咪試下咯，試試下咪會得。」

呃，講得幾好，如果可以用返兩個正面少少嘅例子會再好啲。