是咁的，我嘅職業係動物傳心師: 119.玩同煩

依個理論我曾經喺同一隻情侶鸚鵡傳心嘅時候聽過，估唔到巴膠自己都領略得到。

仲記得嗰次我接嘅客人係叫我睇下佢隻雀做咩事成日啄佢。

「我次次一摸傻丁個頭佢就啄我㗎喇。」我心諗個丁頭咁敏感你仲搞人係抵你死。

嗰位主人將冚住雀籠嘅白布打開，入面有兩隻幾乎一樣樣嘅情侶鸚鵡，都係身體嘅羽毛係綠色，頸以上嘅係羽毛就黃橙色，只係個深淺度有少少唔同。

「我摸傻西個頭又唔見佢啄我。」





直到我同傻丁傳心，佢先話主人成日搞佢個頭好煩。

「點解呀？我同佢玩之嘛，你話佢知我係同佢玩啦。」

傻丁話︰「佢係搞我，唔係同我玩。」

其實好多時人類自以為同寵物玩緊，包括摸下佢哋個頭、無啦啦抱起佢哋、走去搞人哋啲手手腳腳、掂下佢又縮手呀咁，動物都係覺得厭煩多過享受。

人類自以為係撩寵物一齊玩，但其實佢哋係覺得主人搞住晒。





重點唔係你想同寵物玩，而係佢哋嗰刻係咪想同你玩。

情人上床都睇嗰日有無心情；你向朋友提議玩大富翁，佢都有權話唔玩；但情況一轉到人同動物身上，主人往往會無視寵物其實唔係時時都想同佢玩嘅事實，係都要夾硬嚟。