是咁的，我嘅職業係動物傳心師: 116.錢、女、樓

以前每次約出嚟食飯，大家嘅話題都離唔開邊個邊個又換畫食新女呀、宿舍邊層有呵雞呀、上莊個個都係八公八婆呀、被莊員講是非呀、下個sem reg咩科呀、邊個professor唔伏呀、邊科唔會爛grade呀、要去試邊間放題呀、去完旅行嘅所見所聞呀咁樣。不知不覺間，我哋嘅話題已經變成幾時寫完畢業論文、幾時搵工、去邊度grad trip、日後嘅生活會係點、最後一日上堂嘅感覺、唔再係學生係點樣、幾時行畢業禮、搵到工未、學生八達通就到期、老闆點、同事點、人工點、客人點……話題會因為生活而改變，而改變咗嘅生活係無得返轉頭。

眨眼間已經廿六歲，畢咗業原來都四年，依家佢哋嘅話題基本上都是對生活嘅抱怨。聽講上一代依個年齡已經開始談婚論嫁，但我每次問Dada幾時同仔仔拉埋天窗，佢都會話︰「哪有錢！你老母！」
到佢哋問我，我就會話︰「哪有女！你老母！」

至於問到有錢又有女嘅巴膠幾時結婚，佢次次都話︰「哪有樓！你老母！」

最悲哀真係莫過於有錢有女都結唔到婚，咁但係無樓結婚唔通真係走去同老豆老母住咩？上床都上到提心吊膽驚阿媽撞門入嚟叫你飲湯啦。

問題係就算做到巴膠咁嘅職業，起碼每個月都搵緊幾皮嘢，咁嘅專業人士都買唔到樓，就證明香港樓市幾咁畸形。





而綠燈嘅感情生活就仲未太穩定，我哋通常都唔會問佢。