是咁的，我嘅職業係動物傳心師: 117.放過自己

我哋傾下樓價幾痴線，又講下買咗邊隻股票賺咗一千幾百，再加上大量對份工嘅不滿，基本上就會係我哋成晚嘅話題，而通常講到返工我就唔出聲，費事被Dada同綠燈發現我無做。

「話說，點解你要揀個咁嘅地方慶生呢？你明知我唔鍾意依種sell動物嘅café㗎啦。真心如果唔係你生日我真係會調頭走。」

綠燈同Dada已經撚緊貓，同其他港女一樣話佢哋好得意，叫我幫手影相。

「我咩都唔知呀，佢話依度㗎咋。」Dada一嘢篤住綠燈背脊。

「下話，佢喺門口同我講係你喎。」





「你咪癲啦，綠燈話要借我生日過橋，等你嚟再接觸下其他貓仔呀。佢話咁樣話唔定會令你想養返貓，可以幫你放低餐肉喎。依啲女人嘢似我會做㗎咩？」

綠燈一嘢打落Dada度︰「你使唔使講晒出嚟呀！佢聽到個目的係咁仲點樣自然放低啫！」

「超，佢係要放過自己呀，三年前已經養過隻新㗎啦！使等到依家？貓貓狗狗佢返工都見唔少啦。」Dada掃平波斯貓嘅毛髮，巴膠都走咗過去一齊捽隻波斯貓下巴。