是咁的，我嘅職業係動物傳心師: 115.各自嘅生活

我哋坐低嘅時候枱上面已經有一大堆外賣紙，睇嚟係一間唔供應嘢食嘅café，但就有特色飲品提供。

「好肚餓呀叫嘢食先啦。」依句亦係Dada嘅口頭禪，基本上佢除咗講粗口同話要食嘢就無第二啲嘢講，佢食極唔肥依度好嘢。

我哋好快點咗個肯德基桶餐，就開始返工吐苦水大會，始終我哋都唔細，除咗我係freelance咁接客嚟做動物傳心，佢哋都分別做緊唔同工種：巴膠係腦科醫生、Dada做緊網上平台記者；綠燈就返緊銀行，而Dada同綠燈其實唔知我辭咗份工去做傳心師，更加唔知我有超能力。

有時會有啲懷念以前仲讀緊大學嘅日子，特別係幾條友一齊走堂去深水埗食譚仔，真係一世難忘。唔係話件事有咩咁特別，而係大家明明上緊唔同嘅堂都話走就走然後去食嘢，總感覺自己唔會孤獨。