是咁的，我嘅職業係動物傳心師: 114.DADA

室內大約有十隻貓，有兩隻見我哋入嚟就好奇咁望住，Dada就喺入面張枱向我哋揮手。

正要走入去，我準備問下啲貓點解間舖有怪味之際——

「哇好彩無遲。」巴膠嘅聲音突然響起，佢隻手環過我條頸當支撐，大大力唞氣。

「嚇死我咩。少見喎幾乎遲到。」巴膠向來都係早五分鐘到嘅人嚟。

巴膠喘完幾啖氣，望一望室內嘅貓，就細細聲喺我耳邊講：「呃……我啱啱好似見到……無嘢喇。我警告你呀，你今日係嚟係慶生，咪亂用能力呀。」





「睇下點先，我覺得依度有啲唔妥。」

「你唔好咁痴線啦。唉，入去先講。」

沿路行入去，間café都幾多人，大部分都係女仔，個個喺度「好打耳呀好打耳呀！」咁抱起啲貓影相打卡po ig。

我見到啲貓幾有活力同幾親人，或者係已經見得太多客人習慣咗，雖然個樣好似有少少殘，但可能因為係夜晚所以佢哋攰攰地，而且啱啱上嚟嗰陣怪味都慢慢淡出。

我諗巴膠話我痴線都有佢嘅理由。





我哋三個拎住蛋糕入去，同Dada講生日快樂，嘴賤嘅我同巴膠自然加多句恭喜又老一歲。

麻甩系嘅Dada自然用粗口回敬。