是咁的，我嘅職業係動物傳心師: 113.本天貓CAFE

自己養過寵物的話，就好少會去依種以動物為主題嘅café。因為唔係好多間會做得好，而一做得唔好就通常同虐待動物扯上關係。

「佢仲知你嚟到就會勉為其難入埋去㖭，佢生日你唔會話走就走掃佢興。」

「係啦，中晒招。」我哋行上第二層，個木門上掛住一塊寫咗「本天貓café」嘅招牌。一打開門，我又咳咗兩嘢。

「搞咩呀？你病咩？」

「下？你聞唔到好大陣怪味咩？」





綠燈好似狗咁探頭左索索右索索：「普通嘅貓味囉，無咩特別吖。你養貓㗎喎，頂唔順依少少味？」

我環視室內，有啲貓嘅玩具同幾個水兜，但貓砂盆得一個，而且已經用過。