是咁的，我嘅職業係動物傳心師: 112.怪味

「然後發現現實係，嗰個人已經唔喺你身邊。」綠燈一句說話，就無情咁將所有幻想粉碎。我將綠燈手上嘅蛋糕拎到我手中：「你都明啦，你咪又係同我一樣，放唔低。」

綠燈抹走幾乎流出嘅眼淚：「但起碼我接受咗現實，咁樣嘅幻想已經少咗好多。我只係遇到咩大事先會諗下『如果佢喺度就好』，但你係所有生活小事都幻想。」

「我認我係病態咗啲，但好咗㗎喇，起碼我依家已經唔會再夢到佢，淨係夢到餐肉。」

「唉，你有自知之明我都無嘢好講啦。好咗咪好咯，你諗餐肉好過諗佢喇。」

我跟住綠燈走入一棟舊樓，行上樓梯。





「咳。」

貓嘅味道湧入鼻腔，但唔只係貓嘅體味，仲有一啲奇怪味道，搞到我一踏入嚟就噎親。

「喂，乜我哋去貓café咩？」

「係呀，呃⋯⋯Dada無話你知咩？」

我翻白眼：「好明顯無。佢實係知同我講我就唔會嚟。」