是咁的，我嘅職業係動物傳心師: 111.幻想

「有啲嘢無咗就係無咗。就好似你想阿爺嚟睇你畢業咁，就算嗰日有幾多人同你影過相，都換唔到一張你同阿爺嘅合照。」

綠燈聽完，無出聲。佢都有人放唔低，只係唔係情人、唔係寵物。

佢停低，我行過咗佢。

「你畢業嗰日，佢無嚟就係無嚟。依個係事實，追唔返㗎喇。」

逝去嘅歲月同潑出去嘅水都係一樣，追唔返，過咗就係過咗。好多一生人只會有一次嘅大事，嗰個人唔喺自己身邊，我哋就永遠失去同佢一齊經歷嘅機會。





我回頭，見到綠燈又因為諗起阿爺眼濕濕，就再講：「你都好清楚放唔低一個人嘅感覺。就係一次又一次，幻想佢喺你身邊的話會點樣。」我靜靜抬頭，將腦入面每日再三浮現嘅幻想講出口︰

「我幻想過exchange完返香港可以喺機場同佢相擁；我幻想過走堂去佢大學接佢放學；我幻想過我同餐肉最後一次入院佢會喺我身邊；我幻想過同佢去旅行見證唔同地方嘅美景；我幻想過同佢故地重遊諗返我哋第一次旅行嘅甜蜜；我幻想過寫畢業論文嘅時候可以打畀佢講兩句甜言蜜語互相叉下電；我幻想過生日嗰陣佢會陪我食生日蛋糕；我幻想過得閒同佢去匀港九新界；我幻想過佢會同我一齊影畢業相；我幻想過我哋見對方嘅父母；我幻想過我哋各自返工但偷雞打畀對方；我幻想過我哋放工可以去睇戲食飯；我幻想過手機入面愈嚟愈多佢嘅相；我幻想過向佢求婚；我幻想過喺婚禮上我哋眼濕濕相視而笑；我幻想過我哋有啲拗撬但仍然甜蜜嘅新婚生活；我幻想過我哋一齊佈置自己嘅安樂窩；我幻想過我哋會生一仔一女，哥哥叫月晨妹妹叫月曦；我幻想過我哋照顧佢哋嘅情景；我幻想過我哋一齊洗碗；我幻想我哋第一日帶仔女返幼稚園；我幻想仔女第一次病我哋通頂照顧佢哋；我幻想自己開始發福，頭髮又無，而佢都肥咗，黑眼圈深咗，面上愈嚟愈多斑，但我哋出街仍然會十指緊扣；我幻想我哋經歷家人嘅離開，喺葬禮上向客人鞠躬；我幻想我哋嘅仔女長大，帶另一半見我哋嘅時候我哋會煮咩餸；我幻想到同佢白頭到老；我幻想到佢喺病床上，而我捉住佢隻手，同佢講：『下一世，我會成為你嘅樹。』」