是咁的，我嘅職業係動物傳心師: 110.已經無五十年

「你覺得係揦屎上身咩？拍拖點都會開心㗎吓話？」

我哋喺人來人往嘅旺角大街急步行，但我唔識路⋯⋯其實連去邊都未知，所以每次行快咗我都要等綠燈行返去前面帶路。

仲記得我哋四個去泰國grad trip，綠燈總係帶路嗰個，或者因為佢總係向前走，所以唔知道喺後面嘅人有咩感覺。

「我上次開心咗五個月，傷心咗五年。」依條不等式，一生人試一次就夠皮。

拍拖都係求開心啫，開心一秒痛苦一世，我寧願唔拍。





人類所有嘅行為都只係基於兩個動機，追求快樂同逃避痛苦，痛苦大過快樂，仲做嚟做咩？

「你點知下次會點？可能下次就係開心五十年呢？」

我向佢笑一笑，無話佢知，我已經無五十年喇。