是咁的，我嘅職業係動物傳心師: 109.男人唔同

「要唔要蠟燭？」店員妹妹問。我點點頭。

綠燈望住我：「巴膠同我講你身體唔係幾好，你仲咁chur。真心㗎，要放鬆下神經。仲有我唔係淨係話搵毒貓犯件事，仲有餐肉，仲有你ex嘅事。」

佢拎咗店員妹妹遞出嚟嘅蛋糕之後，我哋就向目的地出發。

「唔係咁易㗎葉師父。」

「其實唔放低只係自己同自己過唔去。你睇下我依家我都有個新嘅男朋友啦，你仲係一支公。」





我嘆咗口氣，曾經我以為失戀嘅人同我一樣咁痛苦咁放唔低，後來我先發現有好多人都只係想做下悲劇嘅主角，隨手拎「放唔低」嚟包裝自己。

雖然個叫法同樣係失戀、同樣叫被人飛、同樣叫戴綠帽，但其實每個人嘅痛苦都唔係等量。

大家都會搶住話自己係最痛苦嗰個，但時間一長就知邊個只係自稱最痛，我已經見過太多話自己受情傷點點點、唔再愛人乜乜乜嘅朋友轉眼間就換畫。

一般人嘅放唔低，只係未搵到下一個更好嘅對象，一有就會放得低；下賤啲嘅放唔低，就係搵到下一個，唔理對象更好定更差，其實心入面仲未放低之前嗰個，但就浪費新對象同自己嘅時間，最後都會分開，可能仲會傷多一個愛自己嘅人；而真正放唔低嘅人，係直到靠自己完全放下之前，都唔會再有下一個。

「點同呢？你係女，係被動嘅接受者。你攰你痛，都實有狗公見你單身埋嚟溝你。所以你只要喺當中揀一個就得，唔使嘥心機時間。」





但男人唔同。

「我又唔係女，要做主動同被接受嗰個。我攰我痛、放負能量係無女埋身溝返我轉頭㗎嘛。咁我真係無咩心力再去同人發展，難得終於習慣自己一個，費事又揦屎上身啦。」

撇除女神男神唔講，女人放負一定有班狗公衝埋去，男人放負就連狗乸都走夾唔唞。