是咁的，我嘅職業係動物傳心師: 108.綠燈

「我覺得你應該學習下放低。」綠燈同我等緊東海堂個妹妹將生日蛋糕入盒嘅時候，突然同我咁講。

今日係Dada生日，喺大學時期嘅我、巴膠、Dada同綠燈四個人最老友，成日玩埋一堆。我哋係簡單直接嘅朋友，各自都有自己嘅另一半（雖然我無），唔係嗰種美其名係朋友其實心入面暗戀對方嘅關係。
成年男女之間要有依種友誼真係好罕見，所以我都好珍惜同佢哋一齊玩嘅時間。

我同前度分手之後一直無再拍拖，綠燈同Dada就成日拎我嚟講笑話我等緊佢哋同男朋友分手，我次次都翻下白眼就算，遲啲翻到甩咗眼角膜搵佢哋賠錢就啱。

雖然佢哋久唔久會笑下我，但其實我每一次經歷人生嘅低潮同最痛苦嘅時刻，佢哋幾個都無一例外喺我身邊。

「學緊。」





「你唔似係咯。」

我嘆咗口氣：「啲流浪貓死晒，我可以點放低？」

「但係你咁上心都無用㗎嘛，搵唔到就係搵唔到。警察咁多人都捉唔到兇手，何況你得自己一個？」