是咁的，我嘅職業係動物傳心師: 107.大海撈針

「走喇金仔？」我喺公園又行完一圈，啲捉棋阿伯就向我揮手道別。

日日嚟同一個地方搵線索，啲阿伯同清潔阿嬸都已經認得我。

「係呀，今日朋友生日，要早啲走。拜拜。」

我走之前再望下水池啲錦鯉同大烏龜，佢哋依舊無咩反應。

「如果記得啲咩，話我知，我聽日會再嚟。」我同一時間同晒成個水池嘅動物講嘢，依個星期我已經可以一次過同多於一隻嘅動物傳心。幾個星期前嘅腦檢查係話我用到百分之二十嘅腦區，但我諗依家可以用嘅範圍又多咗，再檢查一次可能已經係用緊三成，甚至係四成嘅腦區都唔定。





能力進化得愈快，我就愈不安，希望喺我用盡條命之前可以搵到個兇手出嚟，但睇依家個勢，我嘅成功率真係唔大。

問題係我幾急都無用，唔係大叫：「你快啲出嚟！」條友就會應聲出現，真係要靠落手落腳搵線索先查到真兇，但依家嘅訊息實在太少，條友唔再犯案就唔會有更多線索，而一犯案又代表會有流浪動物死。一方面我希望佢就咁消失，另一方面我又想佢再次出現。