是咁的，我嘅職業係動物傳心師: 106.無聲無息咁落幕

第二日，我就出咗院，仲再去搵巴膠確認一下個腦嘅情況。雖然舊區域持續病變，但未形成其他腫瘤，即係腦腫瘤我暫時都只得一個，而且壓住嘅地方屬於常人唔會用到嘅區域，所以唔影響日常生活，咁當然如果個腫瘤變大，又或者我再生多幾粒就係另一回事。檢查結果，我自然叫巴膠保密，阿爸阿媽唔會知啦。費事佢地擔心，反正知道又做唔到啲乜嘢。

我把握時間喺中西區流浪貓會出現嘅地點搵線索，但警察咁多人力物力都搵唔到，何況係我呢？最重要嘅係，毒貓嗰條友可能知道自己被人刮緊，所以無再出沒。
線索斷晒，疑犯無埋，而我亦無能為力。

我試過幾次返到過去，但細貓同大佬灰都無見過兇手，所以我亦無可能知道。

喺搵兇手嘅過程中，我亦一直接唔同嘅客人，同佢哋嘅寵物傳心之後，再嘗試睇佢哋過去嘅片段，搵下有無見過可疑人物，但都一無所獲。

大約過咗一星期，我都好沮喪，因為依個世界有好多事，唔係話你落力去做就會得到想要嘅結果。





調查進度係零，連Facebook都已經唔再有人討論毒貓犯嘅事，新聞無報、電視無播、電台無講，無聲無息咁落幕。

好似馬尼拉人質事件、好似南丫島撞船事件，慢慢唔會再有人討論，慢慢唔會再有人關注，社會大眾慢慢遺忘。但又怪得邊個呢？每日都有新嘅新聞，每日都有新嘅報道，長江後浪推前浪。留低真正重視事件嘅人，束手無策。