是咁的，我嘅職業係動物傳心師: 105.三種能力

餐肉死前嘅一刻，喺我面前快鏡重播，意識轉瞬間就返咗嚟病房。

我嘅腦部如果太熱，就會自動中斷回到過去嘅能力，可能因為我之前見細貓已經令大腦升咗溫，所以今次先咁快返嚟，情況就好似電腦過熱自動熄機，之後我未等佢降溫就又開機剪片咁樣。

不過經過啱啱嘅實驗，我可以確定嘅係我嘅能力限制咗對象。一開始我係諗阿爸阿媽巴膠等等嘅人，但我無辦法睇到佢哋嘅過去；而當我諗動物嘅時候，我亦睇唔到一隻街上見過嘅八哥嘅過去。

我再一次嘗試發動能力，今次我就見到大佬灰走近一碟唔知邊個擺低嘅嘢食，之後片段就中斷，我亦發現自己啲鼻血流到成張被一撻撻，好似嚟m唔記得墊m巾咁。

我稍稍清理同止血之後，就瞓返喺床上休息。





「即係話⋯⋯我嘅意識可以帶我返過去，但係對象只限於同我傳過心嘅動物⋯⋯？」我自言自語咁整理所有資訊。


動物傳心。

同外人共享傳心能力。

意識回到過去。

我進一步認知到我可以使用嘅腦區不停擴闊，能力不停進化。





能力愈大，代價愈重。唔知我仲有幾耐命呢？

我好似數綿羊咁倒數自己嘅壽命，數數下，我又瞓著咗。