是咁的，我嘅職業係動物傳心師: 104.重返過去

陳生只係嗰日被我影響，之後就回復返正常。

我可以令其他人短時間內擁有傳心能力。當我咁做嘅時候，應該就會感覺到太陽穴有嘢跳出嚟嘅劇痛。

而除咗動物傳心同共享之外，啱啱我嘅能力好似又多咗一樣。

今次感覺唔再係太陽穴劇痛，而係大腦中心點漸漸升溫，好似運轉得太耐嘅電腦核心咁，直到個腦熱到幾乎燒著嘅感覺。

睇嚟係我又開拓咗一個新嘅腦區，又可以撳一個新嘅掣。





我嘅意識可以回到過去。

雖然我無辦法確定最後出現嘅細貓媽媽係真定係由我創造出嚟，而且我物理上亦接觸唔到任何嘢，但至少可以確定嘅係我可以睇返過去發生嘅事。

我需要知道依種能力嘅限制喺邊⋯⋯係咪隨我喜歡想返去邊就邊？

再次以同樣嘅感覺加速大腦核心，同時不停諗唔同嘅時間點，邊個都好，畀我返去！

大腦溫度急速上升，腦漿沸騰嘅錯覺令我反胃。