是咁的，我嘅職業係動物傳心師: 103.陳生嘅補償

「喂？」陳生嘅聲

汪！汪！

背景係狗嘅叫聲，係話：「再嚟！再嚟！」

「喂陳生？我係阿金，你⋯⋯點解有狗吠聲嘅？」

「啊？我做緊義工，同啲狗仔玩緊。」





吓？我一時之間無辦法理解，然後陳生先話我知佢係為咗做啲嘢補償，先會去做義工。

「補償？」

「我唔知嗰日到底係現實定係發夢啦，但我覺得好真。嗰日同你喺茶餐廳，我好似有幾十秒聽得明嗰隻貓講緊乜。」

陳生嘆咗口氣，話嗰日先知自己到底有幾錯，但佢已經做錯咗。

「真係好恐怖⋯⋯我不停喺度諗，如果我個女有咩事，而我日日喺屋企喊，但無人聽得明我講咩，自己係咪就要死？純粹因爲⋯⋯聽唔明嘅人覺得我煩。」陳生一次又一次咁將自己對細貓媽媽做嘅事，原原本本咁套喺自己身上。





無論諗幾多次，結論都只得一個。

「我真係⋯⋯唔應該咁做⋯⋯」語氣之中，係一種期望可以時光倒流嘅悔恨。

當一個人，真心想回到過去，阻止一啲決定同選擇嘅時候，佢就真係知錯，亦只有真係知錯嘅人，先識得去改變未來。

「我唔理嗰日係點都好，我唔想再犯一樣嘅錯誤。所以我⋯⋯我依家幫動物⋯⋯一方面係想了解佢哋多啲，另一方面係⋯⋯當係我害死一隻貓媽咪⋯⋯微不足道嘅補償啦。」

我深深點頭。





汪！汪汪！

再嚟！掟遠啲！

「哎呀你係咪肚餓呀？好啦，開餐啦。啊，無咩我就收線先喇。拜拜。」

睇嚟陳生要理解動物，仲有一條好長嘅路要行，但點都好，起碼佢踏出咗第一步，而我嘅疑問亦得到解答。