是咁的，我嘅職業係動物傳心師: 98.殺人殺貓之別

已經發生嘅事無辦法變成無發生過。

即使有超能力，都保護唔到想保護嘅事物，依個就係現實。

流浪動物往往只會有兩種命運，一係就被人投訴之後由漁護出手捕捉同人道毀滅，一係就被變態佬整死。

由事件發生至今，警察話「全力追捕」毒貓狂徒，事關毒殺事件以荷李活道公園為起點開始擴散到整個中西區，唔少本身有流浪貓嘅地方，依家只係剩低一條條貓屍。

「問題係差佬仲未捉到人。再係咁落去⋯⋯」





講講下，發叔都忍唔住眼濕濕：「我餵咗佢哋咁多年⋯⋯我當佢哋隻隻都係自己仔女咁⋯⋯點解⋯⋯點解會有人咁殘忍⋯⋯」

發叔話同期有個連環殺人魔，殺第三個人嘅時候已經落網，但死咗咁多隻流浪貓都竟然捉唔到落毒嗰條友，覺得又心痛又氣憤。

殺人同殺貓雖然性質上都一樣係奪取其他生命，但殺人同殺動物喺執行上係兩樣完全唔同嘅嘢嚟──殺完人必須要處理屍體，殺完貓狗可以由得佢哋橫屍街頭。

喺大街殺人會引起動靜，容易吸引其他人嘅注意，但係毒殺流浪貓狗，只係行埋一邊放低毒藥，加上動物毒發嘅時候就算慘叫，都無人聽得明係求救，所以根本唔會有人注意；更重要嘅一點係，好少人可以提供有用嘅證據，因為講到底，死嘅只係貓狗，唔係人。