是咁的，我嘅職業係動物傳心師: 99.一瞬間

好簡單，報紙如果報導話中西區出現殺人狂魔，人人自危，點都會幫下眼留意有無可疑人物，只要每個人都成為執法者嘅眼，捉拿兇手就變得容易。人類重視作為人類嘅生命，同時著眼留意有機會威脅自己嘅危險人物。

如果報導話中西區出現殺貓狂魔呢？都會有人幫手留意兇徒，但人數比例上一定更少，因為只有少部分人會同樣重視另一個物種。一般人只會覺得「殺貓之嘛，我又唔係貓，關我鬼事」，執法嘅眼睛少咗、可知嘅情報少咗，捉人嘅過程慢咗，都係無可厚非嘅事，不過，執法困難其實可以用錢解決。

若果警方投放大量人力物力去搵依個毒貓狂徒，一定好快可以拘捕佢，但警方又會唔會擺咁多資源喺一個殺貓兇手之上呢？同樣係用一千萬，你會用嚟加快搜查殺人犯嘅進度，定用嚟搵一個殺貓犯？各用五百萬無辦法加快速度，咁六四分？七三分？邊一方多啲好？捉殺貓犯快過殺人犯會被大眾公審，所以警方會喺邊一邊落重本捉人？答案不言自明。要怪，就只能怪唔好彩，毒貓事件同連環殺人案一齊發生，資源一定會放落後者。無可奈何。
「我⋯⋯嗚⋯⋯唔⋯⋯」我遞紙巾畀佢用拎嚟抹眼淚同鼻水。

我睇得出發叔真係好傷心，試問有邊一個願意長年累月餵流浪貓狗嘅人，會想見到自己照顧過嘅動物一隻隻慘死街頭？即使明知對流浪貓狗投放感情最後會無所依歸，仍然不知不覺開始照顧佢哋。

建立感情要太多時間，摧毀關係只需要一瞬間。