是咁的，我嘅職業係動物傳心師: 94.一個月

聽到依句，巴膠嘅眼淚已經滿瀉，但佢更加激動：「咁你仲一路用傳心能力嚟自我毀滅！」

用傳心能力嚟自我毀滅⋯⋯啊，原來將兩者咁直接擺埋一齊嘅時候，就知點解我會有種奇怪嘅感覺。

如果傳心能力係達成自毀目的嘅手段，咁我一直以嚟的而且確係喺度慢性自殺。

我將手輕輕放喺巴膠手背上。「唔係咁㗎巴膠。」我雙手嘅力度微微增加，堅定咁望住佢對眼。「回歸到一開始，我連傳心能力對我有害都未感覺到嘅時候，就已經諗好要點用依種能力。」

知道自己擁有超能力之後嘅第一個念頭，係希望同被人捉返協會嘅流浪動物溝通，幫佢哋搵主人。





三年前開始，一切嘅初心，並唔係用傳心能力慢慢整死自己。

雖然行咗三年，連我自己都開始有啲唔清唔楚，尤其係隱約感受到用超能力嘅代價係無命之後，就更加淡化咗初衷。不過只係淡化咗，並無消失。

「我係想幫人同動物，互相理解。」

巴膠沉默，放開我，將被揸皺嘅衫領慢慢掃平。

「我⋯⋯仲有幾多時間？」





「慢的話三個月。」

「快的話呢？」

「如果你繼續完全唔節制咁用超能力，可能一個月都唔定。」