是咁的，我嘅職業係動物傳心師: 93.值得

「你唔好同我講笑喇！」巴膠忍唔住扯起我衫領，但佢耷低頭，無正面望我，只係大啖大啖咁喘氣嘗試冷靜。

「唔好以為我唔知你諗緊咩⋯⋯餐肉死咗之後，我知你一路個心都諗住要死埋一份，你咁樣只係慢性自殺！」巴膠用力抬起頭，咬住下唇，淚水喺眼中浪下浪下。

被巴膠咁樣講一講，我理論上應該感覺到被理解，因為我一直都真係咁諗。

我想死，我想見餐肉，但我唔可以自殺，所以追求一場令我死亡嘅意外，或者一個摧毀我嘅絕症。

我已經成功咗，我終於等到，我應該好開心先係，但我發現我無，而面對巴膠嘅說話，我亦隱約有少少被人冤枉嘅不快，但佢的而且確講中我一路以嚟嘅諗法。





咁點解我會有依種委屈嘅感覺呢？

「唔通我哋⋯⋯我哋依啲喺你身邊繼續愛你嘅朋友⋯⋯真係咁唔值得你留戀咩？」

「值得。」