是咁的，我嘅職業係動物傳心師: 95.你唔係英雄

「我明白喇。」要處理細貓嘅問題，唔需要咁多時間。

「係喇，我嗰日入醫院搞到間茶記好混亂，有無咩報導？」

「有，連YouTube片都有。」巴膠開畀我睇。

我望住手機，以第三者角度睇返我同陳生當日發生咩事。

「陳生點？」





「佢無事，仲早過你出院，你可以放心。」巴膠指住片入面，撳實個頭嘅我問：「到底發生咩事？」

我如實向巴膠報告自己嘅感覺，包括太陽穴嗰種奇怪嘅痛楚，都仔細咁描述佢聽。

「照你咁講，即係好似有嘢喺你太陽穴跳出去咁，之後就無咁痛，但陳生就聽得明段錄音嘅貓叫聲？」

「完全正確。再加埋你話我腦入面嘅活躍區對外擴展，我覺得⋯⋯可能係傳心能力進化咗。唔止我，甚至可以令其他人都擁有傳心能力。」

「咁唔使問，依種能力最危險。」





「點解呀？如果我可以令更多人共享我嘅能力，就真係可以令人類同動物完全互相理解㗎喇喎。」

巴膠嘆氣搖頭，竪起一隻手指：「第一，傳心能力有代價。如果你將能力傳比另一個人，你等同於傳染cancer畀人。」又係喎⋯⋯

佢挨近我，舉起第二隻手指：「第二，能力進化代表你嘅腦區擴展到新嘅領域，加速你嘅病變。」果然讀得書多係唔同，推論同分析都好快，仲可以咁清晰咁講我聽。

第三隻手指。「第三，你唔係英雄，就算有超能力，都改變唔到世界。」