是咁的，我嘅職業係動物傳心師: 92.如果幫人會死

我拍下佢膊頭：「咪傻啦。」巴膠雖然係性情中人，但平時已經見太多腦有問題嘅病人，所以慣咗控制自己情緒；不過今次，可能因為病患者係朋友，所以佢都忍唔住。「擴散速度好快⋯⋯」

「我用唔用傳心能力都好，都係無得救㗎喇係咪先？你老實答我，咪呃我話咩依家唔用仲救得返。」

「依家停用或者仲救得返。」

「你家陣係咪呃病人兼好朋友呀？」

巴膠拎紙巾抹鼻水：「我同你講真話，真係唔知，因為你完全係異類。」佢指住我張腦圖橙紅色嘅部分：「人類出現咁耐以嚟都無試過有人可以用到大腦20%機能，你係第一個。我哋完全唔知你嘅腦結構同運作方法同普通人有咩分別，話唔定你停用能力就可以令個腫瘤消失。」





「唔知我腦結構？依度咪有。我個腦同普通人有咩分別？我用多咗區域唔代表我個腦嘅基本結構同常人唔同。」

巴膠想駁我，但駁唔到。

「如果我繼續用，話唔定可以令大腦嘅活躍區繼續擴散，可能用到50%嘅時候就有自動治療腫瘤嘅能力呢？」

佢沉思，咬自己拇指嘅指甲：「講嚟講去，你都係要繼續用傳心能力啫？」

我合埋眼，微笑。「反正用唔用能力，死嘅機會都係咁大，咁我寧願用盡佢，起碼幫到人。」





如果幫人會死，你幫唔幫？我嘅答案係，幫。反正唔幫都會死。