是咁的，我嘅職業係動物傳心師: 91.惡性腫瘤

「咁個黑點呢？」即使我明知黑點嘅意義，仍然問專業人士進一步確認自己嘅情況。算係對命運最後嘅無力掙扎？我唔知，但好似只要一日未得到確切嘅答案，就可以自欺欺人咁同自己講無事。

好似一日未聽到「分手」，就代表段關係無問題；好似一日未參加葬禮，就代表重要嘅人仲未死咁。

不過唔面對現實，唔代表現實嘅問題唔存在，就算唔聽答案，我都知自己咩事。

「係⋯⋯惡性腫瘤。」

「都估到㗎喇。」





巴膠表情好複雜，好似患絕症嘅人係佢咁。「你⋯⋯腦入面其他灰色區域都病變緊，唔使問都知係你啲傳心能力搞成咁！唔准再用！」

我望住自己腦入面嘅黑點，問：「巴膠，係咪無得救？」

巴膠大大力呼咗口氣：「說話唔係咁講，都⋯有可能救得返⋯⋯」佢開始忍唔住鼻紅紅。