是咁的，我嘅職業係動物傳心師: 90.病變

昏迷咗一星期嘅我，醒返之後首先要被醫生檢查一大輪，確定無咩異常之後，有一個人嚟咗探我。

神色凝重嘅巴膠拎住公文袋走入嚟，佢坐喺我床邊嘅木凳上，欲言又止咁。

「腦檢查結果⋯⋯係咪出咗？」心跳慢慢加速，我好似準備聽法官宣判死刑嘅囚犯咁。

「出咗⋯⋯你⋯⋯好唔妥。」巴膠喺公文袋抽出一堆報告，同埋我大腦嘅掃描圖。

我久唔久就會搵巴膠做腦部檢查，而我有自閉症嘅事，佢同我做第一次檢查之後已經知道，結果除咗我個腦入面活躍嘅區域同自閉症患者、正常人嘅活躍區同時重疊之外，並無咩特別異樣，不過點解可以用到傳心能力，到目前為止都仲未搵到原因。





巴膠拎出兩張圖，左邊張圖嘅大腦有幾個部分染上藍色，右邊嗰張嘅大腦除咗藍色仲有橙紅色嘅部分──橙紅色以藍色區域為基地，向外擴散。

「你用緊大腦百分之二十嘅機能。」

我呆一呆。「阿鬼你都係講返中文啦。」

「我咪講緊中文囉！你個腦入面嘅活躍區擴展緊，而且擴展完之後，舊區域嘅腦細胞就開始病變。」巴膠拎出另一張圖，今次藍色嘅部分出現幾個灰色區域同埋一個黑點。「灰色嘅地方係持續病變緊嘅區域⋯⋯」