是咁的，我嘅職業係動物傳心師: 89.我希望係，一萬年

唔止阿媽阿爸，我心入面都相信，係餐肉醫好我，所以，唔會有第二隻貓可以替代佢。

有時我會諗，如果我唔係有病，如果唔係養餐肉之後自己慢慢好返，如果我同佢只係普通嘅寵物同主人關係，咁我應該可以好隨便就養過一隻新嘅寵物。

依個故事教訓我哋，唔好同另一個個體有太特別嘅經歷。

拍拖都係一樣，如果同每個情人都只係行街睇戲食飯，咁要搵過個替代品好容易，但如果你情人陪你走過抗癌路、同你環遊過世界、陪你參加過親人嘅葬禮⋯⋯

「簡單」太容易被取代，但「特別」，好難再搵得返。





因為咁，我一直都無再養貓。

唔係發返個咁嘅夢，我都幾乎忘記咗自己有過自閉。

我伸手去摸盒入面嘅餐肉，但手去到佢個頭上面嘅時候，成個場景就突然拉返遠。

我已經忘記咗佢嘅溫度、佢嘅觸感，所以個夢無辦法重現撫摸餐肉嘅感覺。

無論我伸幾多次手，都摸唔返餐肉個頭。





我放低手，放棄，繼續靜靜睇住發呆嘅餐肉。

我哋就好似觀眾同演員咁，中間隔咗一個電視螢幕。佢見唔到我，但我見到佢；我想摸佢，但我摸佢唔到。

電視機被雜訊干擾，餐肉被雪花切割成不規則嘅形狀。

我知道，我要醒喇。

我愛你。





如果記憶係一罐罐頭，我希望你依罐餐肉永遠唔會過期；如果係都要喺上面加一個期限，我希望係，一萬年。