是咁的，我嘅職業係動物傳心師: 88.奇蹟

自閉症嘅成因好多種，其中一個係先天性，因為自閉症患者使用緊大腦嘅其他區域，所以理解唔到普通人理解到嘅事物。以我嘅情況為例，由於大腦入面接收外界訊息嘅區域太發達，但處理嘅速度就唔夠快，所以我鍾意睇死物，因為靜止物體放出嘅訊息量比移動物體放出嘅少。

「只能夠話係奇蹟。」當時我會例行去見醫生，醫生見我情況好轉咗咁多，於是同我做咗個腦掃描。

「你睇下，依張係金仔以前嘅腦掃描圖，依張係依家嘅。」醫生向我屋企人解釋，導致我患有自閉症嘅腦部區域維持不變，但我依家可以使用埋正常人會用嘅區域，而我大腦中處理外界訊息嘅部分強咗好多。

雖然一直搵唔到原因，但阿爸阿媽好相信係餐肉醫好咗我。

不過即使我已經好返，有啲特別又奇怪嘅興趣仍然留喺度，其中一樣就係望住唔係好郁嘅餐肉





餐肉好鍾意盒，紙皮盒呀鞋盒呀禮物盒呀⋯⋯唔理個盒大定細，總之見到有盒佢就會塞自己入去，一入咗盒，餐肉就幾乎成日都唔會郁，淨係會久唔久轉下頭，到食嘢屙屎屙尿先會出嚟。

除咗盒，餐肉都好鍾意發呆，佢唔係好玩玩具嗰啲嘢，只要有牆有窗畀佢望住佢就可以禪修一日。

我成日會喺佢側邊問：「你參透到宇宙點嚟未呀？」佢望下我，懶理，眨眨眼，就行咗去。

「死仔貓。」