是咁的，我嘅職業係動物傳心師: 87.自閉症

以前我懷疑過餐肉同我一樣有自閉症，事關最開始養佢嗰陣，佢同我幾乎一樣，都係明顯唔理其他人，淨係沉醉喺自己嘅世界。奇妙嘅係，我偏偏鍾意睇佢自得其樂。諗返轉頭，如果餐肉係隻扎扎跳周圍走嘅貓，我諗當時嘅我就唔會鍾意佢。因為每個有自閉症嘅小朋友都會對唔同嘅嘢感興趣，亦會有特別討厭嘅事物。而我偏好靜止唔郁嘅事物，如果嗰樣嘢隔好耐先會郁下，有啲反應，咁我就會好開心。相反如果嗰樣嘢成日移動，我就會頭痛，亦會想除之而後快。所以細個嗰陣我拍死咗好多通屋飛滿地走嘅昆蟲。

對自閉症有認識的話就會知，依個病愈早醫愈有效，但幾乎都係無辦法根治，只能夠改善。所謂「早」係講緊三四歲嗰種年紀，而我就係六歲開始接受治療，但效果一直都唔顯著，直到餐肉出現。社工又好，醫生又好，都話我喺兩三年內達到幾乎完全康復嘅狀態，所以我中一先識嘅同學，幾乎全部唔知我係自閉症患者，因為喺佢地眼中我完全同正常人無分別。

所有人都話，依個係奇蹟，而由我情況好轉開始，餐肉就開始跟住我嘅步伐相對上活躍返一啲，連喵喵叫都多咗。