是咁的，我嘅職業係動物傳心師: 86.相遇

我同餐肉相處咗十三年，遇上佢嗰年，我十歲，當時嘅我有自閉症，已經會成日好集中咁望住同一樣嘢好耐，有一日阿媽帶我見完社工返屋企嘅時候，我喺樓下條街嘅冷巷見到一隻貓仔。

當時餐肉好細隻，都無正常貓仔嘅活力，佢淨係望返我轉頭，又唔叫又唔郁。

「走喇仔。」阿媽拖住我，想拉我走。

「唔⋯⋯唔⋯⋯！」我半踎低同阿媽抗衡，塊面乸埋一嚿咁，拉扯咗一陣，阿媽都無我辦法，於是放開我，由得我喺路邊睇貓。

我望住貓，阿媽望住我。





對自閉症嘅我嚟講，最高記錄可以望住同一樣嘢四個鐘，仲要係死物。

十五分鐘過去，貓仔向我喵咗一聲。

「嘻嘻！」阿媽話佢好記得，我自從三歲開始就無笑過，嗰次係久違地再一次聽到我嘅笑聲。

「金仔呀，我哋帶佢返屋企好無？」當時我仲未好肯講嘢，但都聽得明阿媽講乜。我走上前，抱住隻貓。之後，我屋企就多咗個成員——餐肉。