是咁的，我嘅職業係動物傳心師: 85.夢

聽人講，睡眠係分割出嚟嘅死亡，人喺瞓著嘅時候，就係最接近死亡嘅狀態，所以瞓覺嗰陣我哋無痛苦，亦無快樂，我哋嘅意識超越空間時間，超越因果定律同邏輯，只要發過夢嘅人就會知道我講緊乜。夢突然出現，唔講邏輯，超越時空，橫跨生死；餐肉喺我面前，縮咗自己入盒，發緊呆。

嗰陣嘅餐肉已經好肥，我成日叫阿媽唔好私底下餵佢食咁多，但老娘已經進化咗做湊孫阿婆咁，瘋狂整嘢畀餐肉食。有次我去完街返到屋企，見到佢整咗兩大塊雞胸肉，我正想開餐嗰陣佢就拍我隻手。
「你食㗎咩？畀餐肉㗎。」留意返我先係你個仔喎。講真有時真係會呷醋。

餐肉喺個盒度發呆，我望住佢。

佢向來唔係一隻特別活潑嘅貓，好多時佢都係搵到個靚位就唔郁，而我就睇住唔郁嘅佢。我好鍾意就咁望住唔郁嘅餐肉，佢久唔久眨下眼、擰下個頭，我就已經覺得好開心。