是咁的，我嘅職業係動物傳心師: 84.昏迷

嗰一晚，凌晨時分，耳邊響起貓嘅叫聲

「仔呀⋯⋯女呀⋯⋯你哋幾時返嚟？媽咪好掛住你哋呀⋯⋯」

胸口發熱，身體好似自己有意識咁走出房、離開屋企、搭𨋢，然後喺街上沿住聲音嘅源頭摸索。細貓媽咪嘅叫聲一直喺街上迴響。

終於搵到。半夜發出青光嘅貓眼轉向，同陳生四目交投。

「原來就係你晚晚叫春下話？」





貓散發出殺氣，弓起身，尾巴直立。「你係咪要嚟帶走我啲仔女？」

「唔使起哂螯咁嘅。喂你晚晚咁搞法唔掂喎，我唔瞓個女都要瞓㗎。」

「係咪又要好似嗰陣切咗我身體入面啲嘢咁，切埋佢哋嗰啲？」

「拍硬檔幫幫手，唔好再晚晚咁叫喇好嗎？唔係我call漁護㗎，漁護好恐怖㗎，專捉你哋去人道毀滅。」陳生伸出手：「嗱，講好喇。」

「我唔會畀你傷害我啲仔女！」





手臂傳嚟灼熱嘅痛楚，皮膚被利爪割裂。

我喺陳生嘅慘叫聲之中，恢復自己嘅意識。擘大眼，見到陌生嘅天花。

病房好靚，床嘅質感亦唔係公立醫院嗰種，我喺私立醫院嘅病房。

夜深，凌晨四點。

頭痛好咗好多，但仍然感覺到大腦入面好似有異物蠕動緊咁樣，我拎返放喺床頭嘅手機，上面嘅日期⋯⋯十月二十五日？咁⋯⋯咁我咪足足瞓咗成個星期？





頭仲係好痛，唔理咁多喇，有咩瞓到朝早先再講。

當我合埋眼，竟然好快又瞓著咗。