是咁的，我嘅職業係動物傳心師: 83.陳生嘅記憶

陳生流出兩行鼻血，全身抽搐，翻白眼，跌喺地上，好似就嚟會變喪屍咁狂震。

餐廳內其他客人尖叫，同我哋保持距離。

老闆向伙記命令：「閂門！睇住邊個未畀錢唔好畀佢走！」

「Call⋯⋯call白車！」某個客人大嗌。

「咩⋯⋯咩呀⋯⋯」





錄音繼續播放。

陳生喺地上慘叫，不停掙扎，口吐白沫，眼角流出嘅淚水都慢慢染紅，再咁搞落去，白車都未到陳生已經無命，但係我應該點做？我茫無頭緒，但見到當錄音重複播放嗰陣，陳生就七孔流血。搏一搏啦！

我伸手拎返枱上嘅手機，撳停咗段錄音。陳生終於無掙扎，全身一鬆。

茶餐廳嘅客人發出驚叫。

我喺凳上面碌落地，慢慢靠近陳生。





「陳⋯⋯陳生？你⋯有無事？」頭痛依然持續，我伸手探陳生鼻息，好彩只係暈咗。我嘗試打下佢塊面，睇下佢會唔會醒，點知喺手掌同佢塊面接觸嗰一剎那，我感覺到痛楚好似喺草叢突然撲出嚟嘅蛇咁，用力咬落我太陽穴度，比啱啱嗰種破繭而出嘅痛厲害一百倍。

一段段陳生嘅記憶好似鐵釘咁頂住我個頭殼四周，然後被無形嘅鎚仔大大力轟落去。鐵釘刺入我嘅腦髓，酸臭嘅反胃感湧上心口，我即刻嘔到成地都係。

茶餐廳入面拍緊片嘅客人，終於抵抗唔住恐懼，可能以為我哋中咗咩病毒，爭先恐後跑向餐廳出口，同守住大門嘅伙記發生衝突。

「放我哋出去呀！」、「嗰兩條友都唔知咩事！」、「畀咗錢先准走！」、「鎖門！」、「死人喇仲收錢！」

我喺噪音之中蜷起自己嘅身體，好似胚胎咁，撳住自己個頭，感受咬住我太陽穴嘅尖牙用力撕破我嘅皮膚，鑽入意識。





眼前一黑。暈之前，我⋯⋯我見到⋯⋯陳生嘅記憶⋯⋯