是咁的，我嘅職業係動物傳心師: 82.能力失控

但係⋯⋯我真係⋯⋯真係好想陳生都知道，段錄音到底講緊乜⋯⋯好想⋯⋯好想令佢都能夠理解⋯⋯

痛！「啊⋯⋯啊⋯⋯」左右太陽穴突然劇痛，好似有朵花由腦中心強橫咁鑽出去，喺皮膚上綻放咁。我用力撳實額頭，忍唔住叫出聲。

「你無事吖嘛？」陳生見我頭痛，問我做咩，但我痛到無餘力去答佢。

「喂？你唔好嚇我呀！」陳生手機跌喺枱面，細貓媽咪嘅錄音響起：「咩⋯⋯咩呀⋯⋯」

陳生由對面枱走埋我身邊，貼近我，雙手捉住我：「你無嘢吖嘛？」





太陽穴嘅痛楚飆升到巔峰，就好似一粒異形蛋突然孵化，怪物飛撲而出一樣。

「呀！」當我嘅痛楚開始減輕，就聽到陳生慘叫咗一聲。

我吃力咁轉頭望向佢，見到佢撳住自己個頭。茶餐廳內其他人有啲驚，望住我哋，但無人過嚟幫手。

「咩⋯⋯咩呀⋯⋯」陳生皺起眉頭，流露嶵難以置信嘅神色，轉向枱上播緊錄音嘅手機。「咩⋯⋯咩呀⋯⋯點⋯⋯點解會咁㗎⋯⋯點⋯⋯點解會變咗人聲？」陳生望住枱上嘅手機，喺我身邊退開。

佢⋯⋯聽得明啲錄音？





陳生撳住自己額頭，痛苦咁慘叫，好似就嚟嘔咁狂咳。

頭痛令我幾乎無辦法思考，但我啱啱太陽穴嗰種痛，簡直就好似有嘢喺入面破繭而出一樣，唔通係我嘅能力離開身體，過咗畀陳生？

「啊⋯⋯啊啊啊啊！停呀！停呀！」陳生發癲咁撞個頭落枱面。

點算！點算！我點先可以收返啲能力返嚟？