是咁的，我嘅職業係動物傳心師: 73.選擇權

「你嘅方法⋯⋯係咪肥榮叔講嘅傳心神棍？」

我點點頭：「你信唔信都好，我的確聽得明動物講咩。今次我會搵你，都係因為幫緊隻貓搵佢失蹤咗嘅媽咪。」

「你係有能力先可以走⋯⋯」

「咪痴線啦你！你係一個獸醫，學返嚟嘅嘢通通都係你嘅能力，根本唔需要指望超能力。我就算識動物傳心，如果有動物喺我面前被車撞到，我都無能力幫佢做急救！你即使無傳心嘅超能力，但你都可以救到我救唔到嘅動物！」

人往往憧憬超能力，忘記咗自己所擁有嘅能力。





「你都有能力作出改變，選擇權永遠喺你手。」

You don’t need super power to change the world, you have power to change it.

我留低啞仔喺原地思考，準備出發去見投訴嘅陳生。

我唔知啞仔會點樣選擇，因為改變係困難嘅事。雖然每一個渺小嘅人類都有能力作出改變，但並唔係每一個人都願意改變。唔想改變嘅人總有自己嘅藉口，想改變嘅人總會搵到啱嘅方法。

燦神話齋：「一個唔得，第二個再入，第三個再入，第四個再入，我唔相信無一個方法唔得！」





但其實所謂絕望嘅前奏，就係依種以為可以改變到乜嘢嘅自大。