是咁的，我嘅職業係動物傳心師: 72.改變到乜嘢？

「我每殺一隻，就要諗返我救過一隻⋯⋯但慢慢⋯⋯我發現殺嘅數量比我救返嘅仲多⋯⋯」啞仔捉住我衫領，揸皺咗。「阿金⋯⋯我戴眼鏡已經太耐⋯⋯每晚沖涼瞓覺除低，一諗到依啲問題，我都逃避⋯⋯但係就算面對又點？我已經分唔清咩係啱咩係錯喇⋯⋯」啞仔用頭一下一下撞喺我胸前：「只要佢哋有攻擊性⋯⋯只要佢哋無人領養⋯⋯只要佢哋被人棄養⋯⋯或者主人搬新屋唔畀養寵物⋯⋯生咗仔唔想養寵物⋯⋯我就要做人道毀滅⋯⋯」撞擊停止，佢開始用拳頭揼我膊頭：「點解你要打甩我副眼鏡？點解唔由得我麻木落去？點解要我再諗返嗰啲記憶？」

「既然你明知有問題，就去改。」壓抑自己嘅情感去做一份有問題嘅工，無視自己嘅諗法，遲早會崩潰。

「點改？我只係社會上嘅齒輪，齒輪改變唔到個鐘點行㗎！」

我捉住啞仔對手：「連你都唔相信自己嘅力量的話，就咩都無可能改變到！」

佢呆一呆，反駁：「咁我又可以改變到乜嘢？」





「我點知呀！你唔去試下喺度齋問改變到啲乜，梗係乜都改變唔到啦！唔係知道可以改變乜嘢先去作出改變，而係你改變咗之後先會知道你改變到乜嘢！！！」

啞仔聽完，慢慢鬆開揸實我衫領嘅手。

「要點做，從來都係你自己嘅事。我揀咗離開依個地方，用我自己嘅方法幫動物。」