是咁的，我嘅職業係動物傳心師: 74.錄音

我同啞仔分開之後，就去咗一間茶餐廳同陳生會面。

「係啦，咪就係依隻咯。」

我出示啞仔send畀我嘅相，陳生就確認係同一隻

「大佬，佢晚晚喺度叫春，一到凌晨點幾兩點就叫，仲叫得咁大聲，我梗係投訴啦。」陳生話佢同老婆啱啱生咗小朋友，女女每晚都會被貓嘅叫春聲嘈醒，搞到睡眠質素好差。

「你知啦，bb仔嚟講瞓得好好緊要㗎嘛，瞓覺瞓得唔好，影響個腦發育㗎。」





我點頭話：「我明、我明。」

「咁之後我試過落街睇下隻貓咩料啦，佢就搲咗我一嘢，你睇吓，條痕仲喺度，無呃你㗎。咁我call你哋啲人搞掂佢咯，我已經無搵漁護㗎喇。」陳生指一指自己右手臂上三吋嘅貓抓痕。

「不過咁嘅陳生，事關嗰隻貓我哋一早幫佢絕咗育，所以理論上應該就唔會再叫春。」

「我唔知佢叫乜啦，啲聲差唔多就當係㗎喇。呀，我有錄低隻貓嘅叫聲。」

陳生拎部手機出嚟，展示咗四段錄音：「我嗰陣怕你哋話我無證無據會唔處理，所以特登錄低咗。嗱你睇，我錄咗四晚，佢真係晚晚都點幾兩點就叫，有晒記錄㗎，無花無假，你話係咪困擾先？」





錄音時間的確係凌晨。

「咁又真係幾困擾嘅⋯⋯係呢，你介唔介意我聽下啲錄音？」