是咁的，我嘅職業係動物傳心師: 69.渺小人類

或者好多人唔知人道毀滅嘅過程係點，簡單嚟講就係幫動物注射過量麻醉藥，麻醉藥經身體吸收之後，強行抑止心臟跳動功能，由心臟停跳到死亡仲會有十幾秒嘅時間，動物會掙扎、慘叫、抽搐、失禁、嘔白泡，到死為止。

我並唔反對人道毀滅，依項手術嘅存在本來係希望減少動物受衰老之後嚴重嘅疾病折磨，如果要一直痛苦咁苟延殘喘，完全無好轉嘅希望，用依個方法令佢哋去得痛快啲，縮短佢哋受苦嘅時間，未嘗唔係好事。

諷刺嘅係，依種情況下嘅人道毀滅反而少之又少，手術慢慢偏離原始目的。我發現，就算研發技術嘅人心存善念，都阻止唔到大量人以惡念去運用，炸藥就係另一個偏離原始目的嘅技術。

炸藥之父，瑞典化學家諾貝爾，係呀就係諾貝爾獎嗰個諾貝爾呀，佢講到明好後悔發明炸藥。本來嘅炸藥係諗住幫修路工人炸毀大石巨岩，幫助採礦、鋪路同開路等等嘅大型修繕工程，但實際上將炸藥用喺依種地方嘅情況少之又少，反而被各國廣泛咁用作軍事用途，由助人工具變成殺人武器。

原本想幫工人嘅炸藥，到頭來喺戰爭中炸死嘅無辜工人不計其數。





「依三隻都唔例外，一直叫、一直叫。」淚水喺啞仔眼眶盪漾、鼻頭微微泛紅，佢察覺到自己想喊，就即刻戴返眼鏡。

視界一轉，佢又變返毫無感情嘅死神，好快冷靜返，眼淚無流出嚟，眼鏡真係好似佢感情嘅開關。戴上眼鏡，封閉心靈。

啞仔救過嘅動物不計其數，但殺死嘅亦多到數唔晒，肥榮叔話佢同時係天使亦係死神，但我覺得，啞仔都只係一個身不由己嘅渺小人類。