是咁的，我嘅職業係動物傳心師: 70.求下你！

讀咁多書做得獸醫，無可能係一個冷血又無愛心嘅人，最開始希望成「醫」，一定係希望拯救自己所愛嘅事物，但當真係成「醫」，先發現原來自己嘅工作唔淨係拯救咁簡單，亦要親手將自己所愛嘅動物殺死；如果啞仔唔分裂一個無感情嘅自己出嚟，好容易崩潰。

「三隻都喺打針嗰陣一直叫？」啞仔點頭。

「未打針之前呢？既然嗰個人投訴係叫春聲，即係拉長嘅叫聲，應該唔會隻隻都咁叫，你一定記得咁叫嗰隻貓㗎，係邊隻？」

啞仔托一托眼鏡，無出聲，眼神閃縮埋一邊。

我捉住佢膊頭：「你一定有印象！」





啞仔推開我：「我⋯⋯我唔想記起呀！打針嗰陣已經夠痛苦，我完成咗工作㗎喇！唔好要我諗返嗰個情景！」

我深呼吸，冷靜，望住啞仔。

啪。由靜止唔郁到起手，只係用咗半秒，啞仔嘅眼鏡被我打飛落地

「啊⋯⋯呀⋯⋯」啞仔想衝過去執返，但我即刻捉住佢。

「對唔住啞仔！我應承咗人要幫佢。佢已經等咗隻貓好耐喇！我知你知道係邊隻！話我知！求下你！」