是咁的，我嘅職業係動物傳心師: 68.痛苦悲鳴

細貓嘅毛色係好大眾化嘅啡黃色，佢媽咪應該都差唔多色，而喺啞仔手機入面就有五張咁上下顏色嘅貓。

我問啞仔邊隻係雌性，有三隻。

問題嚟喇，三隻都咁似樣，又無咩身體特徵，點知邊隻係細貓媽咪？

你畀鼎爺同Troll doll我分我都未分得掂啦，連吳京我都覺得似黎明，巴斯光年又係鄧梓峰扮嘅，媽呀好亂呀！人都未分得掂，何況貓？

咪住，冷靜先，我仲有一樣嘢可以問啞仔。。





「叫春？」啞仔用衫襬抹眼鏡，抬頭思索。

「係絕咗育仲叫春。」

連啞仔都聽到皺晒眉頭：「吓？無理由㗎喎。」

「我知係無理由，佢無幾耐之前先被你哋絕咗育，不過投訴嗰位陳生真係話佢叫春。」

「絕咗育仲點會叫春？太監閹咗會唔會想搞太后吖？」





「我知係無可能，但嗰條友真係投訴隻貓叫春吖嘛！依三隻貓入面，有無邊隻不停叫？」

啞仔嘆口氣：「每隻動物，喺人道毀滅嘅時候都會叫。」佢手中嘅每一隻動物無一例外會痛苦悲鳴。