是咁的，我嘅職業係動物傳心師: 67.遺照

啞仔兩隻手指夾住煙，喺我面前搖兩搖，煙絲喺煙頭化成左右擺動嘅蛇信。

佢另一手拎出手機：「記得。我擰頭，係唔知你講邊隻。」手機展示出相簿入面一張又一張嘅相，佢係咁喺我面前左掃右劃，睇嚟係叫我喺相度搵返隻貓出嚟。

死火啦，我未見過細貓媽咪咩樣㗎喎，畀一疊相我都無用㗎。

手機入面所有嘅貓貓狗狗，都係啞仔喺進行人道毀滅之前影嘅相。

「點解你要幫佢哋每一隻都影相？」





啞仔望住向上升嘅煙。

「遺照。」

啞仔食完支煙，就除低眼鏡。佢每次一做依個動作，就會變返一個可以正常溝通嘅人。之前都係因為佢除眼鏡後開聲同我哋閒話家常，我哋先知佢原來識講嘢。

佢話眼鏡就好似一個轉換器，當佢嘅視界由清晰變得模糊不清，就會覺得眼前嘅一切毫無真實感，好似被薄紗阻隔嘅一場夢，令佢可以想講乜就講乜。

而清晰嘅視界，係畀佢用嚟做嘢，精準咁睇出要喺動物身上邊個位落針，因為佢習慣專心一致直視死亡，亦令佢戴上眼鏡嘅時候唔想講嘢。





睇得太清楚，一切都變得醜陋，啞仔唔想對醜陋嘅一切發言，即係好似你見住何君堯連膠都費事畀一樣；反而喺一個朦啲、睇唔出瑕疵嘅世界，佢先樂意同人交流。

我拎住啞仔手機一路睇相，眉頭一路忍唔住皺起上嚟。一張又一張貓狗嘅遺照，隨我手指嘅滑動喺螢幕上一掃而過。有大有細、有老有嫩、有肥有瘦、有重病、有健康。

心臟嘅跳動變慢咗，好似有人用手揸實個心唔畀佢跳咁。

每張相都代表逝去嘅生命，佢哋行刑之前嘅無助、哀傷同絕望，喺手機之中滲透出嚟。