是咁的，我嘅職業係動物傳心師: 66.啞仔

為咗確定真偽，我就打電話，真係有人聽：「陳生呀？哦我係受協打嚟㗎，係呀係呀，關於你上次單投訴嘅，係呀係呀，有無話邊日方便，再補返少少資料咁呢？係嘅，係嘅，唔好意思呀個肥佬同事做嘢係咁多甩漏㗎喇，話佢蠢過隻豬係侮辱咗隻豬。好好好，唔該你！」我收線。

「你講咩蠢過隻豬呀吓？」

我收返個電話，轉身就走，頭也不回，懶得理佢。下一站係去搵啞仔，雖然肥榮叔話隻貓已經死咗，但點都要再去問清楚啲。

我行到去獸醫部門，時間係下午五點四，距離收工仲有兩個字。

姑娘見到我就問我咩事，我話係嚟等啞仔收工，佢就由得我坐喺度。





五點七，啞仔收工，去換一換衫執下嘢，五點九終於出嚟，佢見到我，側一側頭，好奇我點解會喺依度。

啞仔其實年紀仲大過我，但因為好童顏，加上個頭係好薯嘅河童屎塔蓋，配埋大框金絲四方眼鏡，所以畀人感覺好似係薯嘜大學year one咁。

「啞仔，得唔得閒傾兩句？」啞仔點點頭。

我哋兩個離開受協，企喺街邊，啞仔拎出煙，點著，深深吸咗一口氣，向虛空吐出，裊裊白煙飄升、消失。

「我想問你，肥榮叔佢哋嗰日捉返嚟嗰隻貓⋯⋯你仲記唔記得？」啞仔搖搖頭。





「咁又係，你每日見咁多，又點會記得。」