是咁的，我嘅職業係動物傳心師: 65.情報

「喂唔該我想報——」話口未完，肥榮就搶走我手上嘅電話，大叫一句：「打錯呀！唔好意思。」佢cut線之後就隨手掟咗我手機喺枱面。

「當阿叔怕咗你喇。我哋收到投訴話有隻流浪貓晚晚叫春，嗰條友去睇，就被抓傷咗。」叫春？細貓媽咪絕咗育，仲點可能叫春？

「收到投訴我哋梗係做嘢啦，於是就去望過下，夜晚喺公園外面發現就係啱啱絕育無耐嗰隻雌貓，真係惡到癲，搞咗一輪先捉到返嚟。」

我捉住肥榮嘅手突然一軟，不祥預感好似曱甴咁由腳底沿住脊骨爬上後腦。

「雖然唔係好明點解佢絕咗育仲會叫春，但唔關我事嘅，總之我係收到投訴先去做嘢啫。」我都喺依度做過，如果流浪動物有太強攻擊性的話⋯⋯





「之後會點，我諗你都好清楚。仲想知詳情的話，你去問啞仔啦。」

可以的話，我真係唔想去見啞仔，因為佢係負責進行人道毀滅嘅獸醫，企喺死囚身後嘅劊子手。

肥榮叫得我去搵啞仔，即係細貓嘅媽咪，已經無得救。

「咁當然，啞仔答唔答你就另一回事啦。」我哋叫得佢做啞仔自然有原因，因為佢向來唔太出聲講嘢，所以有好長嘅一段時間，我哋都以為佢真係啞。

「喂，有無投訴人嘅資料？」





「有登記，但唔會畀你囉。」我拎返枱上嘅手機，又打數字。

「喂呀，私人資料唔可以畀你㗎。真係規矩嚟㗎喎，你都知啦。」

「唔可以受賄都真係規矩嚟，你都知㗎。」

「唉⋯⋯我講一次㗎咋，陳生，電話係六一二三四五六七。」

「個電話咁好記嘅？好似啲垃圾小説求其改嘅冧巴咁喎。」





肥榮叔翻白眼：「無呃你㗎，點敢呃你呀？」