是咁的，我嘅職業係動物傳心師: 58.彩虹橋

我嘅傳心術，性質上同煙酒性毒一樣。你問傳心術令我有咩快感？我估應該係幫到人同動物互相理解嘅成功感，同幫到人嘅滿足感。雖然幫落去，我就會無命，不過無所謂喇，反正我條命都一樣係冗長無為，又或者，我內心期盼緊自我毀滅。

由餐肉離開我開始，就一直期待一場意外、一個絕症，等我唔使自殺都可以死。啲宗教話自殺係有罪，有啲話無得上天堂，有啲直情會落地獄，我寧可信其有：假設人對死亡世界嘅幻想都係真的話，我就唔可以自殺，因為我死咗之後有個地方想去。

聽人講動物死咗之後，會去一個叫彩虹橋嘅地方。

嗰陣我返兼職做酒吧，有個同事wtsapp狀態有一句「願我們在彩虹橋再會」，問返佢佢話屋企隻狗走咗，然後就話我知動物死咗之後會去嘅天堂，就係彩虹橋。雖然人去嘅天堂同動物去嘅天堂唔同，但我諗偷雞飄一飄去睇下餐肉應該無問題嘅。

當然，如果死後係乜都無，就無咩好講啦；但可以的話，我好希望真係有彩虹橋。