是咁的，我嘅職業係動物傳心師: 60.最後一個

「放心啦，我有時用得太耐先暈一暈，好似肌肉拉傷咁上下，復原到嘅。」實際上我身體係咩狀態，就要等巴膠份報告先知，或者無我想像中咁差，或者比我想像中更差，但點都好，我仍然會繼續運用能力。

「喵。」細貓喺我腳邊望住我。

「我應承過幫你。」

所以，如果代價係我嘅壽命，即管攞去。

我踎低，對住娥姐：「咁我哋繼續之前嘅話題，你聽到細貓嘅媽媽亂講乜嘢？」





「佢會成日望住前面幾吋嘅位，但雙眼無焦點，然後不停問：『幾時返嚟？』過無幾耐就開始自問自答，話你哋唔返嚟喇？點解你哋唔返嚟？好似⋯⋯想招返仔女嘅魂魄返嚟咁。」

細貓聽完，有啲訝異。由佢聽到大佬灰話自己媽咪係痴線，到依家聽到娥姐描述，細貓嘅反應就好似從來無接觸過一隻咁嘅貓咁。

「平時喵咪唔係咁㗎⋯⋯」

大佬灰喺後面行過，打咗個喊露：「啊～你喵咪根本係咁痴線，只不過平時係你瞓著咗先嚟發癲啫。」

喺細貓眼中，佢媽媽係正常；喺其他貓眼中，佢媽媽係異常。





每當細貓瞓著咗，失去仔女嘅悲痛就會呑噬佢媽媽嘅理智；但反過嚟講，喺佢媽媽心目中，細貓反而係佢自己可以保持理智嘅防護罩。

因為已經無咗五個，因為只剩返最後一個，所以細貓變得更加重要。